Geguritan

            Basa Jawa iku sugih kasusastraan, salah sijine yakuwi geguritan. Miturut kamus, geguritan iku tembang uran-uran utawa karangan kang pinathok kaya tembang, nanging guru gatra, guru wilangan, lan guru lagune ora ajeg. Dene miturut Subalinata (1994:45), Geguritan iku yakuwi iketaning basa kang memper syair. Mula ana sing ngarani syair Jawa gagrag anyar. Tembung geguritan asale saka tembung gurita, tembung gurita owah-owahan saka tembung gerita. Tembung gerita linggane gita, tegese tembang utawa syair. Geguritan Jawa sakawit tinemu ing lagu-lagu dolanan, saiki mujudake wohing kasusastraan puisi kang werna-werna wujuding dhapukane.

            Adhedasar dhapukaning ukara lan pangiketing tembung, werna-werna araning geguritan, kaya ing ngisor iki :

1.    Syair rong gatra sapada      : gita dwi gatra

2.    Syair telung gatra sapada   : gita tri gatra

3.    Syair patang gatra sapada  : gita catur gatra

4.    Syair limang gatra sapada  : gita panca gatra

5.    Syair enem gatra sapada     : gita sad gatra

6.    Lsp.

Babagan kang awrat saka geguritan, yakuwi : tema, pamilihane tembung utawa diksi, sarana retorika, lan amanat utawa pesen kanggo pepeling marang wong kang maca.

Tuladhane :

Pahlawanku (R. Tantiningsih)

Pahlawanku

Wutahing ludirmu

Nyiram ibu pertiwi

Nadyan sang ibu

Kudu muwun sedih

Karajang-rajang manahe

Karujit-rujit rasa pangrasane

Pahlawanku

Mugya Gusti paring nugraha

Semana gedhene bektimu

Jiwa raga, bandha donya

Tanpa sisa

Amung siji pangajabmu

Merdika 

sumber : materi buku LKS kelas XI semester 1